Monday, January 3, 2011

شفافية وتحذير...؟






الشفافية
كانت (الشفافية) إلى عهد قريب لغزاً محيراً لسقيم معتل الآخر مثلي
ظننتها من الشفايف حين كنت مراهقاً غضاً
وظننتها (قلة أدب) حين طالبت زوجتي بمزيد منها في علاقتنا
واعتبرتُها بمثابة اعلان الحرب حين رأيتها معلقة في شكل لوحة على مكتب مديري اللص
وتيقنت أنها شفرة من نوع خاص حين تداولتها مخابرات العالم بتوصيات ملزمة
وفهمتها (صح) حين أعلنها وزير الداخلية بعد حدوتة طويلة عن (خطر الإرهاب) على الأمة
وفهمتها (صح قوى) عندما اعلنا من اكبر كبير !؟ باننا سنقطع رأس الافعى وسنقطع الايدى الخارجية!!!!!


المحذرون

صرت متيماً بسالفة "نحن نحذر" التي يطلقها المحذرون
يطلقونها ربما لكائنات أخرى ينتظرون منها أن تحسم الأمر وتتخذ خطوات ايجابية وتخلي عندها دم وتعتني بهذا التحذير أشد العناية
رئيس حكومة يحذر من انتشار الفساد في حكومته ، منظمة العالم الإسلامي تحذر من انهيار الأقصى !
يحذرون من ؟! لا هم يحددون من المعني بالتحذير ولا نحن نفهم ضمنياً من المُخاطب !
حتى تفشي الأمر وصار ممارسة شعبية بدلاً من قصرها على الحكومات والمسؤولين
فهذا جارنا البقال قد وضع تحذيراً مكتوباً باللغتين المحلية والانجليزية
يحذر فيه من تفشي ظاهرة السرقة في بقالته ، ويطالب الجهات المعنية بالتدخل لحسم الأمر

!

ومن فرط اعجابي بهذا الـ

Approach

لمعالجة المشكلات ، اتخذته شعاراً في عملي ورفعته عالياً
فكتبت محذراً الجميع من تجاهل حقوقي والإعلان عن كارثة قريبة قد تحدث في مكتبي ..

فكتبت :
نحن نحذر من ظاهرة سرقة الأقلام واختفاء المحايات وتلوين ظهر الكرسي بأصباغ مجهولة المصدر

!!!!!!!!
فى الحقيقة هو... تحذير لجهة ما .. بقرب حدوث شئ ما .. بطريقة ما .. تشبه الأبكم الذي يصرخ في عيال الحارة (بااااااه)
المهم أني لم أقرأ في يوم من الأيام تعليقاً على هذه التحذيرات من أحد الجهات الغامضة المعنية بالتحذير
كأن يخرج أحدهم فيقول : نشكر الحكومة الموقرة على تحذيرنا وقد قمنا بعمل اللازم
أو جهة أخرى مثلا تشكر القادة العرب على تحذيرهم من فشل المفاوضات السلمية وتقول تم اتخاذ اللازم

خد مثلا ...نحذر من الذين ينشرون ويؤججون الفتنة الطائفية

من هم الذين نحذرهم ونتبرأ منهم ومن افعالهم؟ ولما لا نسميهم ونشير اليهم

واأسفاه

الداء فينا ومنا ....ولا زلنا نحذر ونبعث رسائل التحذير الى " المبنى للمجهول"


مشتبه به

29 comments:

شهر زاد said...

فعلا هي مصطلحات فقد معناها الحقيقي وطمست من قواميسنا واستبدلناها باضداد وتقبلناها بصدور رحبة
للاسف نحن نعيش الزمن الرذيل

تحياتي

Tears said...

عارف يا سال

فيه واحد على الفيس بوك كانوا لسه بيكلموا عنه فى برنامج صباح دريم كاتب النهاردة ان ح يحصل تفجير تانى و ان هو اللى ح يعمله بس المرة دى مش ح يموت اى ابرياء لكن ح يعمل حاجة تفرح تسعه و تسعين فى المائة من المصريين

يارب يكون اللى فى بالى

Unknown said...

عندك حق هي ايه الشفافيه دي أصلن؟
و رأس انهي أفعى اللي هيقطعوه؟
و طول عمرنا بنحذر مين؟
معندناش غير اسرائيل شماعة كل المصائب و المختلين هم كبش الفدا
لحد امتى هنحط راسنا في الرمل و للأسف يوم ما نتصرف بيبقى تصرف بمنتهى الغباء و الغشوميه
أشكرك على البوست
تحياتي لك

Haytham Alsayes said...

كلنا دون كيشوت !!!!!

تحياتي علي التدوينة الرائعة

إنسان || Human said...

ههههههههه
عجبتني قوي جزئية الشفافية أمابالنسبة للتحذير ...هم ياعزيزي يختصرون ويقلصون أفعالهم في هيئة تحذير متخيلاً أنه فعل مايستوجب فعله
إذا حذر وأطلق التصريحات ...يكون بكده إستريح وعمل اللي عليه وزيادة

-_- said...

فكرتني بالفئة المندسة

جايدا العزيزي said...

اجل هى الشقاقيه

ولكن اين هى الان

معك حق الداء منا وفينا

تحياتى

فاروق سحير ( فاروق بن النيل ) said...

Sal........
نحذركم جميعا من الإلتفات إلى كلمات مشبوهة من ناس مشبوهين فى أرض مشبوهة
يفعلون أعمال مشبوهة ودمتم
المذهول فاروق بن النيل

فشكووول said...

السلام عليكم سال
تحياتى
اصل الموضوع ان احنا بنطجن فى المطجن وبنبيع الميه فى حارة السقايين
طب اللى بيحذر ويتوعد .. هو مش عارف ان هو السبب فى كل ده ولا يكونش انا السبب وما حدش واخد باله

البنفسج الحزين said...

تحياتي يا سال علي البوست الرائع...
كلامك صح بس موضوع التحذيرات دة زيه زي الجمل الاكلشيهات
نشجب وندين ونندد ونعارض
وسنضرب بيد من حديد علي كل من تسول له نفسه )

كلنا عارفين انها كلام للاستهلاك المحلي علشان الشعب يطمن وينام في العسل بس خلاص الاسلوب ده قديم قوي ومعدش ينفع معانا احنا خلاص بقينا خبرة فيهم
(دي عشرة 30 سنه بقا)
وعجبني قوي مفاهيمك المختلفه للشفافيه
تحياتي

sal said...

قبل ما ارد على تعليقاتكم

انا احتج وبشدة واندد واشجب كمان
ان ماحدش خد باله من القادوم اللى فى الصورة المرفقة...؟
طيب ياترى لزمته ايه
افصد القادوم
مش احتجاجى

sal said...

شهرزاد

هكذا تماما
بل يبدو لى اننا لم نتفهم معانى
المصطلحات اصلا وقبلنا ما وصل الينا
من فهوم ومعانى دون ان نفكر فيها

تحياتى وتقديرى

sal said...

يا رب يا تييييرز

انت واخدة بالك من التحذير والشجب
والاحتجاج انكم ما خدتوش بالكم من القادوم
اعمل ايه بس

تحياتى وتقديرى

sal said...

شيرين

المهم انه فى كل مرة وحدث
نبحث على الشماعة
احنا كويسين واخر تمام
هو دا اللى ديما بيحصل
انما نحاول تبحث عن السبب
لالالالالالا
دى حتوصلنا لحاجات احنا بنخاف نتكلم فيها


تحياتى وتقديرى

sal said...

صديقى هيثم

يا ريت حتى نطول دا

احنا بندفن راسنا فى الرمله
وندور لنا على اى حاجة بس احنا لا
قبضنا على المجرم يا فندم وكله تمام

تحيا الفهلوة
يعيش الخوف اللى مكبلنا
عاشت شعاراتنا المدوية
دامت الحركة الجهادية ضد الكفرة
والخارجين عن السرب امثالى
!!!!!
انت فاهمنى كفاية كده

تحياتى وتقديرى

sal said...

كلنا يا هيومن
بس المسألة درجات

احنا خايفين نحط ايدينا ع الجرح
المهم عندنا الشر يكون برا وبعيد
والحقيقة ان الداء مننا وعلينا

تحياتى وتقديرى

sal said...

شارم

هههههههه

طب والله فعلا فيه فئة مندسة
هههههه

بس توصيف تلك الفئة هو اللى نختلف عليه

انت ما بتجيش ليه

sal said...

جايدا
الدا منا وفينا

الحمد لله الفكرة وصلت
برضو
كل سنة وانت والعائلة بكل خير

sal said...

استاذ فاروق

وصل تحذيرك يا فندم

علم وينفذ
كله تمام

المخلص سال

sal said...

اخويا فشكووووول

باين لها كدا

ما علينا يمكن اللى بتكلم عن ثقافة التسامح ويلفت الانتباه الى التطرف هو السبب ومش واخد باله
ويمكن اهل السلطان مالهمش دعوة
واسرائيل مالهاش دعوة
والمجاهدين الغيارى على الدين والامة
برضو مالهمش دعوة
اكونش انا سبب البلاوى دى كلها ومش واخد بالى
ههههههه
ساحذر واحذر
و ا خ د ر

حتى نعرف السبب

مفيش غلطة مطبعية

تحياتى وتقديرى

sal said...

البنفسج المبهج

انا متهيألى العشرة مش 30 سنة
احنا نايمين فى العسل من زماااااان
بس مش واخدين بالنا
هههههه

تحياتى وتقديرى

Anonymous said...

عند حضرتك حق جداااااا

لا في شفافيه ولا احساس بالمسئوليه وكل الناس بتتهم بعض ..

تحياتي

sal said...

فتاة الصعيد

احنا يا دكتورة بنتهم اى حد فى اى حاجة
الا اننا لا نلتفت لانفسنا واهلنا وما يسود فى عقولهم من مخلفات الكراهية والتطرف ولو جبنا السيرة بنطلع منها زى الشعرة من العجين ...نستنكر ونتبرأ
ويبقى خلصنا ذمتنا

...........

تحياتى وتقديرى

Noha Saleh said...

كلمة شفافية دى بتتقال فى كل البرامج والاحاديث التلفزيونية ومعظم اللى بيقولوها واللى بيسمعوها للاسف مش فاهمين معناها ايه اصلا

Tamer Nabil Moussa said...

بجد احنا عندنا حالة افلاس فى كل حاجة ربنا يخرجنا منها على خير


تسلم الايادى


مع خالص تحياتى

sal said...

نهى


والله باين فيه حاجات كثييير مش فاهمينها
بس بنكابر

اللى بيقول بيخبط
واللى بيسمع متلخبط

شكرا لمرورك الكريم
تحياتى وتقديرى

sal said...

تامر

انا فهمت تقريبا اللى تقصده

بافلاس

بس ياترى ممكن لو بصينا من زاوية تانية
تلاقى

عندنا تخمة وتضخم

فى المسميات والمصطلحات
بس عايزه فرز واعادة فهم

شكرا لك
تحياتى وتقديرى

ماجد العياطي said...

استاذنا العزيز سال

التحذير مهم عشان لما يحصل التفجير يقولوا احنا حذرنا

بس كده

شوفت سهلة ازاي وتفسرها بسيط

تدوينه جميله ورائعه فعلا وعلى الله يفهموا

اصل الناس دي لو فهمت مايبقاش ده حالنا


تحياتي

sal said...

ماجد
نورتنى بعد خياب
ارجو ان تكون بخير

تحياتى وتقديرى