Tuesday, December 21, 2010

فلامنجو؟















A shifting flock of flamingos assumes a whimsical shape in the Gulf of Mexico









تنوع واختلاف على شئ واحد

....................

الصورة التالية ..تجمع لطيور الفلامنجو " النحام " فى خليج المكسيك

والمصدر هو ناشيونال جيوغرافيك ...

طبعا هما فرحانين بهذه الصورة وعاملين منها من احسن الصور فى الشهر الفلانى

وهكذا .....

طيب ...انا تخيلت فى دماغى عدة نوعيات من البشر وفكرت ..ان كل واحد سيكون رأيه مختلف عن الاخرين ....يا ترى ماذا سيقولون

عند رؤيتهم للصورة ؟




واحد سيقول ..الله الله.. سبحان الله .. ازاى دا حصل ؟ سبحان الله طيور مجتمعة على هيئة

طائر ....سبحان الله

.................

واخر ممن شفطت عقله نظرية الموامرة حتى اصبح مرتاب فى كل شئ سيقول :

اكيد الصورة دى ملعوب فيها من حد وعن طريق الكومبيوتر والفوتوشوب تم اللعب

فى الصورة !! دول امريكان غشاشين

...................

وواحد فلحوس وابو العريف سيقول :

دا اكيد كان فيه اعصار وتسبب فى رياح وتيارات هوائية شمالية غربية على شرقية جنوبية استوائية مدارية!

مما اضطر الطيور على التجمع بهذا الشكل !!!!

......................

وواحد ما يعجبوش العجب ولا الصيام فى رجب سيقول :

يااااااه لو شوية طيور طلعت قدام شوية كان المنقار بقى عدل

وياااااااااااه

لو الطيور الموجودة تحت عند الرجلين بعدت عن بعضها شوية كان ممكن الرجلين

يبقوا منفصلين وشكلهم احلى !!!!

.........................

وواحد من اللى ما يحبونيش سيقول :

يا اخوانا الصور التى بها روح حرام...ولا يجوز ان نهتم بها ولا نعلقها ولا نعملها خلفية على الكومبيوتر

..........................

وواحد بينظر دائما للنص الفارغ من الكوب سيقول :

طائر ايه اللى بتقولوعليه دا......... طب فين الجناح !!!

......................

وواحد انتوا تقولوا صفته ...سيقول :

ايه يعنى المصور السكة دا بتاع الناشيونال جيوجرافيك ...دا انا لو معايا هيليوكبتر

كنت خدت صورة احسن من كده!!!

......................

وواحد كذاب سيقول : انا شفت حاجة زى كدا بس الطيور كانت على شكل تمساح!!!

......................

لسه فيه كثييييير بس احسن واحد هو

الواحد الفاقد واللى عامل فيها راس فجله سيقول:

ايه معنى البوست دا.... !!؟

هههههههه

26 comments:

فاروق سحير ( فاروق بن النيل ) said...

Sal....... أستاذ صلاح .........
على فكرة ساعات كثيرة السحب بتعمل أشكال مثل هذه بالضبط على أشكال مختلفة وكمان ساعات ابص للقمر ليلة أن يكون بدرا ( 14 فى الشهر العربى ) فأجده على شكل إنسان وجميل جدا له عينان وأنف وفم وأذنين صدقنى وحتى من أشرت لهم بذلك رأو هذا وصدقوه هناك حالة غريبة للإنسان لانعرفها فى أنظارناوفى الكون ربما هناك سر ما لاأعرفه شكرا على هذه الصورة الرائعة فعلا . لى قصيدة جديدة بحكاية معها من تأليفى أود أن تعطينى بصمتك وشكرا لك

Haytham Alsayes said...

اللي لفت نظرى
الاسم الفلامنجو ودى موسيقي شعبية اسبانية مستواحاه او تطور من الموسيقي الاندلسية حتي في الاسم ومعناها الفلاح يغني لانها موسيقي الريف الاندلسي
وشكرا


تحياتي علي البوست ياصديقي

Anonymous said...

السلام عليكم و رحمة الله و بركاته أخي الكريم المشرف على المدونة

أن صاحب مدونة الأمل أردت أن أدعيك لزيارة مدونتي و ترك بصمتك فيها و الادلاء على رأيك فيها

تقبل مني فائق الاحترام و التقدير

أنا - الريس said...

أنا طلعت من النوع المرتاب واللي ميعجبوش العجب .

بس إنت نظرتك إيه يا سال

فاتيما said...

ايه دا ؟!!

خلى بالك
انك كدا بتتحدى راس الفجلة
و بتقطع ليه
و تصادر على رآيه


مش كل البشرية
هتفهم البوست يعنى
الله!!!

آه صحيح
ايه معنى البوست دا يعنى

بتغيظونا اكمن الطبيعة متمثلة ف الطيور الجميلة دى طلعت اكثر شياكة مننا احنا البنى آدمين اللى مبنعرفش نتلم سوا فى صورة بديعة كدا


انا عاوزة اقولك انى اول ما شوفت الصورة
افتكرت حاجتين
ملهمش علاقة ببعض

الأول افتكرت حلقة كارتون لتيمون وبومبة كنت بشوفها مع يوسف
عن طيور الفلامنجو اللى واقفة متحفزة ف جزيرة وتيمون هيموت ويعرف بيعملوا ايه وبومبة بيقوله سيبهم ف حالهم ..كانت حلقة مضحكة قوى
وكنت بستخدم تعبير الفلامنجو مع يوسف لما نبقىف موقف يستدعى الفضول القاتل


تانى حاجة الصورة فكرتنى بيها
وقت زلزال اكتوبر 1992 ...
اصل احنا بلكونتنا بتطل على ميدان
وف وسطه تمثال

وقت ما حصل الزلزال
بصينا بعده م البلكونة
لقينا البشر عمالة تتجمع حوالين التمثال ف مشهد عجيب ..مشابه لكدا
وبعد شوية
اتفرقوا ...


الملخص
م الآخر
ملكمش دعوة براس الفجلة الغلابة
يا بتوع لا إكراااااه

هه


انا طلعت اول واحد
لتفتكرونا تبع الفجل
انا بس محموقالهم سلف

:)

سلام يا سال
يا غال

Tears said...

من العنوان افتكرت ح تكلم عن الموسيقى

جميل اهتمامك بالطبيعة

sal said...

استاذ فاروق

التأمل فى الطبيعة متعة فكرية ليس
لها مثيل

حاضر يا استاذنا انا رايح عندك
تحياتى وتقديرى

sal said...

صديقى هيثم

شكرا ع الاضافة الجميلة

بس انت ما اقولتليش تفتكر انا حاطط البوست دا ليه
او انطباعك انت عليه

تحياتى وتقديرى

sal said...

شكرا مدونة الامل على الدعوة الكريمة
ويسعدنى زيارتكم والتعرف اليكم وعليكم

تحياتى

sal said...

سيادة الريس
حبيب قلبى وعقلى

دايما الرؤساء كدا
لازم يبقوا مرتابيين وواخدين بالهم
لحد يطلع الفجرية ويقول البيان الاول للثورة فى غفلة منهم

اما انا فانطباعى خليط
من بعض ما ذكرت
ولدى مزيد
سبحان الله


تحياتى وولائى

sal said...

فا تى ما

دى بومبه دى حكيمة قوى بالصلاة ع النبى

سيبهم فى حالهم

معاها حق ومعاك حق

دا راس الفجلة دا احد مصائبنا
ولازم يتواضع شوية
ورغم كدا لو خدت بالك انا كاتب انه احسن واحد
ههههههه

فاقد يعنى مش همه حاجة

خلاص بلاش الفجل

ماله الكرنب
ههههههه

عاشت حمقتك المحمودة يا نصيرة المستضعفين
يا ام الخير

خلاص انا سكت اهوه

تحياتى وتقديرى

sal said...

الصديقة تييرز

طبعا باحب الموسيقى

ممكن تكون تدوينة قادمة ان شاء الله
سعدت بمرورك

تحياتى وتقديرى

Tarkieb said...

ربنا يخلى الفوتوشوب.....طبعا مش حقيقية وباينة اووووي ....بس كلامك احلى....عملت موضوع من صورة...استاذ ورئيس قسم.

Dr/ walaa salah said...

كلامك عجبني بجد استاذ صلاح

فعلاً لو مكنتش كتبته كنت هتلاقي كل الاراء دي

انا عن نفسي بيعجبني الطير ده لان شكله جميل اوي والوانه رائعه

لكن على العموم مش هتقدر ترضي الناس كلها

كل واحد بينظر للشئ من وجهه نظره هو

وكل واحد مقتنع انه صح وان رأيه الصواب

مشكور على البوست

sal said...

تركيب

احنا فين بس ياعمنا من استاذيتك
ربنا يخليك يا فنان

تحياتى وتقديرى

sal said...

د ولاء

المرة دى انت قريت البوست كويس اوى
لان تعليقك مميز

تحياتى وتقديرى

Unknown said...

أنا أرى من موقعي هذا أن هذه الصورة مش ملعوب فيها..
لكن الواقع نفسه ملعوب فيه!!!!

إيه رأيك في الفكرة دي؟

هما وزعوا الأكل على سطح المية على شكل الطائر.. فتجمعت الطيور على الأكل بهذا الشكل..!!!!! :)
-----------
صراحة يا أخي سال... أنا شايف إن الموضوع أبسط من كده بكتير... أعتقد أن ردود الأفعال تتراوح بين اثنين: إما التشكيك في الصورة أو قول: سبحان الله!!

لكن برغم كل شيء... الصورة حلوة قوي...

تحياتي.

sal said...

والله حكاية الاكل دى ماجتش على بالى
رغم انى عندى احتمالات اخرى
....
ماشى

........
الحمد لله ان الصورة عجبتك
وعلى فكرة

البساطة هى الحاضن الحقيقى للابداع
حتى فى الكورة بيقولوا
السهل الممتنع
............
تحياتى

Dr Ibrahim said...

هو بغض النظر عن السبب فى الصورة
إلا ان هناك لمحة
جمال لمن يريد ان يتذوق الجمال..
تحياتى لك

Anonymous said...

شبه البطه الصوزه دي :)

بس انا عارفه البوست ده ليه :))

تحياتي

sal said...

جميل جمالك يا د ابراهيم

انا رحت للبوست
روعة
احييك


غير الجمال يا دكتور
انا قصدى تنوع الاراء واختلاف الانطباعات من شخص لاخر طبقا لتركيبته العقلية الفكرية والنفسية

تحياتى وتقديرى

sal said...

صح يا دكتورة
شبه صوصو البطة

اصل الفلامنجو مستخبى فى حفلة تنكرية
ههههههه

المهم عندى انك عارفة السبب


تحياتى وتقديرى

جايدا العزيزي said...

ههههههههههه

طيب ايه معنى البوست ده من وجهه نظرك انت يا سيدى

ههههههههههههههههه

ملعوبه مش كده

انا شايفه ان فى حياتنا اشياء جميله ورائعه

ونادرة لا يعلمها سوى الله

واعتقد انه خلقها لكى يفكر كل منا بطريقته

ويرى الامر بمنظارة كما تفضلت

الفكرة وصلت

اشكرك اخى

تحياتى

Dr Ibrahim said...

لحضرتك تاج عندى
من هناويحق لك الرفض او الإجابة

sal said...

جايدا
خلاص انت كدا قولت المفيد
والمفروض كفاية عليه البوست دا
وانزل غيره

شكرا لتعليقك المميز
تحياتى وتقديرى

sal said...

حاضر يا د ابراهيم