Saturday, October 9, 2010

مفيش حاجة
















من قصيدة مفيش حاجة
ايمان بكرى



كلامى يا خلق فيه حاجة؟
لحد دلوقتى فيه حاجه؟
كلام عادى وبسيط جداً ولا فِهشِ ولا حاجة
ما انا ما أقدرش أقول حاجة
صحيح نفسى أقول حاجة وميت حاجة
لكن مش قادرة اقول حاجة
لأنى لو هقول حاجة
هييجى ناس بتوع حاجة
وياخدونى ورا الحاجة
وهو لو سمع حاجة
هيعملوهالى ميت حاجة

عموما بصو لو واحد من القاعدين
عاوزنى أبلغه بحاجة
يقول مايخفش من حاجة

نعم فيه إيه؟
لالالالالأ مافيش سرقه
ولا تهليب ولا تهريب ولا حاجة

وبتقول إيه
مصمصوا إيه؟ وخصخصوا إيه؟
ده كله كلام مفيش حاجه

قضية إيه؟
ياشيخ روح خلاص مافيش حاجه

حرامى إيه ؟ ولَكّح إيه؟وهرب إيه؟
شــفـافـيـه ومافيش حاجة

وبتقول إيه؟لالالآلأ عـــيب
لافيه تدليسولاترقيص
ولا تدبيس ولا حاجه

سمع مع هووووس
انا حاسسة انه فيه حاجة

دقيقة سكات لَتبقى حداد
انا حاسسه انه فيه حاجة

زمنكوا ياخلق فيه حاجة
ولازموا كام وميت حاجة
ده لو يعنى إذا كان فيه حاجة
انا عن نفسى مش حاسسة ولا بحاجة
ولا متضايقة ولا حاجة

سعادتك برضه مش زيـى مافيش حاجة ؟
أهـه بيقول مافيش حاجة

جنابك برضه مش زَيـىِ وعلشان زيي مافيش حاجة
أهـه بيضحك بيقول مافيش حاجة

ما أنا قولتلكو من الأول مافيش حاجة

عليا النعمه يا اخوانا مافيه حاجة
ورحمة ابويا ويا أبوك على إللّى جابوك ما فيه حاجه

وعهد الله . وعهد الله. وعهد الله
ما خللولنا ولا حاجه

بقلك ايه خلاص خلص و فركش
يلا يا اخونا مفيش حاجه





فيديو دولة جاميكا



23 comments:

أنا - الريس said...

شيطانة الشعر العامي
هي امان البكري
ويطلق ايضا عليها الست في الشعر

اتمني ان يكون ادائي مثلها في الإلقاء

تحياتي ليك يا كبير

Tears said...

أجمل حاجة فيها ان جوزها رئيس مباحث الشرابية

Unknown said...

بصراحة والله أنا ما ليش في الشعر لأنه ما بحبوش...
لكن دايما فيه استثناءات... منها إيمان بكري...!

تحياتي يا سال.

البنفسج الحزين said...

الست دي أصلا تحفه شعرها العامي جميل وطريقه القاؤها رائعه ...
لولا حاجه واحده مضايقاني فيها نفسي تحدد موقفها يا محجبه يا لأ...

Anonymous said...

هههههههه

شفت القصيده دي قبل كده وعجبتني اوي

عجبني اكتر انها حفظاها :)

تحياتي

Haytham Alsayes said...

بقلك ايه خلاص خلص و فركش
يلا يا اخونا مفيش حاجه

بس خلاص كدة

Tarkieb said...

حلوة بس ايه فكرك بيها دي قديمة شوية

Tamer Moghazy said...

"فيه ناس بتعيش عشان حاجة..
وناس بتموت عشان حاجة..
وناس بتموت على الحاجة..
وناس تحلم بحلم جميل..وتصحي وماتلاقيش..حاجة..!!"

انا عارفها من زمان وبحبها قوي :)

sal said...

سيادة الريس

بنت بلد رائعة
بس


كل الامانى ممكنة

نورتنى يا ريس

تحياتى وتقديرى

sal said...

تييرز

السبتية والا الشرابية ؟
هههههه
شكرا لمرورك

تحياتى

sal said...

ماجد

وعشان هى استثناء
انا عجبانى

مش شرط انو يكون لينا فى الشعر
المهم نتذوق الكلمة الحلوة الصادقة

شكرا لمرورك الكريم

sal said...

البنفسج المبهج


المهم كلامها بيعبر عن الحالة

تحياتى وتقديرى

sal said...

فتاة الصعيد

عجبني اكتر انها حفظاها

معاك حق

تحياتى وتقديرى

sal said...

صديقى هيثم

حاضرررررررررر

بس خلاص

منورنى

sal said...

تركيب باشا

القديمة بتحلى

انت عارف لما يكون فيه موقف معين
وتحس ان مثل شعبى بيعبر عنه بطريقة صحيحة
مش بتقوله برضو... وتستدعي الذاكرة
كل ما تراه مناسبا للحظة والموقف ...بس

جديد ...قديم ...نص نص
المهم انه حقيقى
ويعبر عن الواقع بشكل جيد

تحياتى وتقديرى

sal said...

تيمو

سعدت بتواجدك

وانا بحبها كمان

تحياتى وتقديرى

صفــــاء said...

ياصباح جر الشكل

مشيها مافيش حاجه وادينا عايشين اهو

sal said...

صفاء

صباخك زى الفل
مفيش حاجة
اه والله
مفيش حاجة

تحياتى وتقديرى

فاتيما said...

صباح الفل

انا لسه سمعاها ف برنامج ابراهيم عيسى امبارح تقريباً .. و لأول مرة
عجبتنى و عجبتنى زى ما قال بسام
طريقة الألقاء المميزة


بس معرفش ليه من اول جملتين تلاتة
افتكرت عمنا الفاجومى
و قصيدة البتاع

هى تنويعة مشابههة
بس مختلفة
و اهى جاية ع الجرح عموما

يسلم اختيارك


خالص ودى يا غالى

فاتيما said...

آه
و مفيش حاجة
حد بيقول حاجة ؟!!!

sal said...

مامت يوسف

ملاحظتك بخصوص ان رائحة وروح عمنا الفاجومى واضحة
كلام معقول وكلام جميل ما اقدرش اقول حاجة عنه وملاحظة فى محلها
بس برضو مفيش حاجة
اننا نعمل لها بوست فى هذه المدونة المتواضعة ونشيد ونحتفى بها
انها تستحق اكثر من ذلك


لا يا فاتيما
ماحدش قال حاجة
دا بيتهيئلنا بس

مفيش حاجة ولا محتاجة

ما أنا قولتلكو من الأول مافيش حاجة

تحياتى وتقديرى

ماجد العياطي said...

دولة جاميكا تحفه

جميله ياسال

sal said...

صديقى ماجد

يوووووه
امال لو تشوف جمهورية بطيخستان

ههههه

ابحث عن
دستور يا سيادنا
قصيدة رائعة

تحياتى وتقديرى