Tuesday, July 20, 2010

احلم....؟



















احتفاء بكلمات شعرية لشاب شرقاوى اعجبتنى
وكنت قد وضعتها فى عدة تعليقات لى
فى بعض المدونات عندما كان المقام يستحق هذه الكلمات، ولكننى لا
زلت ارى انها تستحق اكثر من ذلك فاحببت ان تشاركونى فى
قرأتها لانها فعلا ... تستحق

************************


احلم أوى ..
احلم بجد ..
دا الحلم عمر جديد فى أيامك يمد ..
الحلم طاقة نور فى واقع مستبد ..
و فى وش أمواج الملل ... الحلم سد ..
الحلو جى ..
طول مانت قلبك لسه حى ..
بس اصطبر ...
إزاى ها تستطعم و لسه الأكل نى ..؟
أصبر بقى ..
و اتحدى لحظات الشقا ..
و التريقة ..
الحلم عايز شعلقة ...
السكة طالت .. بس بردو العمر طال ..
المستحيل هو المحال ..
خليك شجاع ..
عيش بالأمل ..
و اليأس خليه للعيال ..
لو حتى كان بينك و بين حلمك جبال


احمد حمزة
الشرقية- مصر

25 comments:

MR.PRESIDENT said...

ازيك يا سيد سال ليك وحشة ياراجل
كيفك اولا .. اتمني أن تكون بصحة وخير وسعادة وهناء ورخاء وحالم وبتنفذ احلامك قادر ياكريم .

القصيدة بجد أكثر من رائعة ، ابدع فيها الشاعر وإنت كنت تمنيت أن تطول لكي تزيد أحلامي معاها وبدل ما أكون ريس مصر :) أمسك العالم :))

تحياتي لمواضيع واختيارتك المتميزة

فاتيما said...

قريتها
ف عنبر العقلاء يا سال
و عجبتنى جدااااا



فيها اللى المفروض يكون
ربنا خلقنا عشانه

اننا نعمر هذا الكون
نسعى للاكتمال
و لن نناله صحيح


بس لازم نحاول
و المحاولة
يعنى امل
يعنى
"حلم"


و مجهود يبذل
عشان يتحقق هذا الحلم

و يا صابت يا خابت


يا تنجح
يا مكتوب الفشل


كل شىء عظيم
انوجد ف الدنيا دى كانت بدايته حلم

حلم مجنون غير قابل للتنفيذ
من اول وهلة كدا ينسمع او ينقال


و مع ذلك ممكن قوى يتحققتحقق



كنت دايما اقول ليوسف


لولا حد مجنون حلم
انه ممكن يسمع صوت حد تانى
ف آخر الدنيا
مكنوش اخترعوا التليفون
و بعده كل وسايل الاتصال عن بعد
و الناس بقت تشوف بعض
و تكلم بعض
و بينهم مسافات ياما



لولا حد مجنون حلم يطير زى العصافير
مكنوش اخترعوا الطيارة
حتة الحديد الضخمة دى اللى بتنقل الناس و الحاجات من مكان لمكان
و كمان منها اللى
تطلع القمر ؟!!!



لولا حد مجنون حلم بنور
غير نور الشمس
مكنوش اخترعوا الكهربا
اللى بزرار تدوس عليه
تضويلك العتمة
وتهزم الظلمة بشرورها



لولا و لولا و لولا
ألف حاجة و اختراع



كلها انجازات
ابتدت باحلام


حلم عاوز بس
طولة النفس
و الأيمان بالله
و بنفسنا
و السعى نحوه بشرف



تحياتى ليك
و للشاعر الجميل

Tarkieb said...

تحية ليك رغم انها مش بتاعتك بس ساعدت صاحبها على انها تتطلع مرات للنور...حلوة اوووي وحاسس انها حواررواحد مع نفسه...بجد يسلم ايده وايدك

فتاه من الصعيد said...

ده اكتشاف الشاعر ده

يا ريت لو ليه حاجات تانيه تنشرها حضرتك :)

دايما اختياراتك موفقه

تحياتي

sal said...

الدنيا ماشية بأهلها للخلف در ..
الحلو مر ..
والعار يسر ..
والمصلحة لازم تضر ..
عايز تخلص مصلحة ؟
ابرز تمر ..
واعمل شريف تفضل مكانك .. وانت حر ..
أصل الشريف أصبح سخيف ..
والمفترى أصبح نضيف ..
وانت اللى من أهل البلد ..
أصبحت ضيف

sal said...

سيادة الريس

يارب تمسك كل العالم

واحنا معاك

المخلص سال

sal said...

مامت يوسف

تعليق اكثر من جميل
وبه اضافات رائعة

ما تنسيش تعرفى يوسف على
الكلام الحلو دا

بجد بجد اشكر لك تواجدك المتوهج

تقبلى تحياتى وتقديرى

sal said...

الفنان تركيب

بقالى شويتين ماقريتش كلام من القلب
زى كدا ...وسعدت كثيرا بتعرفى عبر التدوين على هذا الشاب الرائع الذى احسب انه يستحق التشجيع

تحياتى وتقديرى

sal said...

فتاة الصعيد

انا استجبت فورا وحطيت
شويه من شعر احمد

انا لم التقىه حتى الساعة
ولكنى اكن له الكثييير من التقدير والاحترام من خلال ما قرأت له

وقد عثرت على مدونته بالصدفة

وعنوانها

اهو

sal said...

http://el-osta.blogspot.com

تحياتى وتقديرى

البنفسج الحزين said...

ياااااه تصدق ان الكلام ده جه في وقته جدا بالنسبه لي ...سبحان الله ...

كلام رائع يقطر أمل وتفاؤل في أيام صعبه كل ما فيها يدعو لليأس ...

تحياتي للشاعر الجميل
وليك طبعا انك نقلته لينا ...

خواطر شابة said...

هل تعرف ان الحلم والامل في غد افضل هو الذي يجعلنا نستطعم هذه الحياة بكل ظروفها وقساوتها
انا اعتبر القدرة على الحلم نعمة من الله الحرمان منها عواقبه وخيمة

بحر الالوان said...

خليك شجاع ..عيش بالأمل ..و اليأس خليه للعيال

ومالهم العيال ولا مؤاخذة .... مش بني ادمين ياعني :) ز


بس عموما .... شعر جميل ... وموهبة تعبر عن نفسها ... نتمنا لها التوفيق والتالق ... وجزاك الله خيرا علي هذا الاهتمام .... هذا عهدنا بك دائما


تحياتي

sweet angel said...

الكلمات فعلا جميله

خلينا نحلم قبل ماالحلم حتى يشتروه
ويخلونا ندفع فلوس علشان بس نحلم

sal said...

خواطر
اشكرك على تواجدك
بقالى كثيير ما رحتش عندك
وانت عارفه ليه
ماليش فى الدراما
ربنا يوفقك
وهنا انت
اختصرت ما يبتغيه الشاعر وانا من هذا البوست...وساحاول الاستمرار فى البحث
عن الشباب الموهوبين

تحياتى وتقديرى

sal said...

صديقى بحر

هههههه
العيال احباب الله
وعلى عينى

انت عارف ان المقصود هو المعنى المجازى

تحياتى

sal said...

سويت انجل

شكرا لمرورك الكريم

الحلم هو ما نملكه ولن يستطيعوا شراءه
ومش حندفع ولا مليم
وحنحلم وحنتمسك بالامل فى غدا افضل

الى اخر نفس

تحياتى وتقديرى

sal said...

البنفسج المبهج

الحمد لله انها جت فى وقتها هذه الكلمات
رغم انى شايف انها يجب ان تكون امامنا فى كل وقت وحين

ربنا يسعد ايامك
ويكون الحلم والامل والتفاؤل
رفيقك الدائم

تحياتى وتقديرى

sal said...

البنفسج المبهج

روحى عند مدونة احمد

وحتلاقى حاجات جميلة عنده

تحياتى

ابو احمد said...

صحيح القدره على الحلم هى القدره على الحياه


على رأى شاعر تانى
لو بطلتا نحلم نموت
تحياتى

dr.lecter said...

مش احمد حمزه ده اللي في السعوديه دلوقتي
خريج كليه العلوم
؟

sal said...

ابو احمد

الامل من افضل الادوية المضادة للاكتئاب
حسب علمى وقناعتى

شكرا لمرورك الكريم

sal said...

dr lecter

والله ما اعرف
انا عرفت مدونته صدفة
وعجبنى كلامه واحساسه
وموهبته
فاحببت ان اعرف اصدقائى عليه
ولو حضرتك تعرفه ابقى سلملى عليه
وعرفه ان له معجبين كثر

تحياتى وتقديرى

amirelhob said...

كلمات جميله اوى بجد يا سال وبجد احلى ما فيها بسيطه كلنا هنفمها من غير ما نرجع لمعانى ومفردات كبيره ز واكبر من اننا نفهمها يمكن بجد دى اول مره فى المدونه هنا بس عاجبنى جدا والتصميم بتاعه كمان جميل

يا ريت تتقبل مرورى وان شاء الله متبقاش دى اخر مره

ومن قلبى بتمنلك كل خير وسعاده وصحه وتوفيق وفرح وابتسامه تدوم يا رب طول العمر وبشكرك على انك وضعت بين ايدينا كلمات تدينا جزء من الامل

sal said...

اشكرك على مرورك الجميل يا امير


تحياتى
وتقديرى